Denne artikkelen er produsert og finansiert av Norges idrettshøgskole - les mer.

Kan vi utvikle unge utøvarar utan å slite dei i stykker?

Eit nytt program skal hindre at toppidrettselevar blir utbrende.

To svømmere ligger i hver sin bane i et basseng, med et blått og gult banetau mellom seg.
«Nærmere Best» skal bidra til at unge ambisiøse toppidrettselevar skal kunne ta informerte val og ta vare på helsa si.
Publisert

Tidlegare forsking har vist at unge, ambisiøse idrettsutøvarar er spesielt utsett for skadar, sjukdom og for lite restitusjon. 

Derfor blei undervisningsprogrammet «Nærmere Best» utvikla.

Det skal gje elevar på norske toppidrettsgymnas og ungdomsskular meir kunnskap, slik at dei kan ta informerte val om eigen helse. 

Kort om programmet

  • Programmet «Nærmere Best» består av ti ulike modular. Fire for ungdomsskular og seks på vidaregåande. 

  • Modulane har namna: prestasjonstrening, vekst og modning (pubertet), OBS-perioder, idrettsernæring, totalbelastning, restitusjon, treningsplanlegging og mental helse (psykt god).

  • Utvikla av Senter for idrettsskadeforskning ved Norges idrettshøgskole.

  • Les meir om programmet her.

Relevant og nyttig program

– Målet er å utvikle unge utøvarar utan å slite dei i stykker eller brenne dei ut, seier seniorrådgjevar på Skadefri-teamet, Hege Heiestad.

Hege Heiestad er spesialist i barne- og ungdomsfysioterapi.

Ho jobbar i Skadefri-teamet ved Senter for idrettsskadeforskning på NIH.

Portrett av Hege Heiestad i hvit skjorte mot grå bakgrunn.
Hege Heiestad er spesialist i barne- og ungdomsfysioterapi og jobbar i Skadefri-teamet ved Senter for idrettsskadeforskning på NIH.

Nå har 20 skular tatt i bruk programmet over halvanna år, og tilbakemeldingane er gode. 

– Både trenarar og utøvarar er strålande fornøgd. Dei opplever at det er både relevant og nyttig, og eit program dei ynskjer og fortsette å bruke, fortel Heiestad. 

I doktorgradsprosjekt hennar har ho vore med på å utvikle og sette i gang programmet. 

I siste fase har både skular og elevar kome med tilbakemeldingar gjennom spørjeskjema.

Helse før prestasjon

– Det er ingen tvil om at vi treng eit program som «Nærmere Best», seier Øyvind Sandbakk, sportsdirektør ved Noregs Toppidrettsgymnas (NTG).

Programmet skal gi elevane kunnskap om korleis dei kan halde seg friske, unngå skadar og halde på motivasjonen.

– Dette er grunnlaget for langsiktig utvikling i idretten, men også for eit godt og aktivt liv, seier han.

Sandbakk meiner det er viktig at elevar og trenarar lærer saman. Slik kan dei skape ein kultur der god helse er ein føresetnad for gode prestasjonar.

No har NTG og WANG inngått ei seksårig avtale om å vidareføre og utvikle programmet.

WANG Toppidrett kombinerer vidaregåande studiespesialisering med eit toppidrettstilbod som er kvalitetssikra av Olympiatoppen.

– Vi har svært gode erfaringar med store delar av programmet, medan andre delar framleis treng noko vidareutvikling, seier Sandbakk.

Dei to skulane skal samarbeide om å gjere innhaldet meir relevant for elevane. Målet er at programmet skal kunne takast i bruk ved toppidrettsgymnas og idrettslinjer over heile landet.

Den travle skulekvardagen er den største utfordringa

Det er akkurat den utviklinga Heiestad og Skadefri-teamet på NIH er i gang med nå.

Fysioterapeut Heiestad fortel at skulane har gitt tilbakemelding på at den travle skulekvardagen er den største utfordringa.

Nokre skular gjennomfører ein modul per halvår, medan andre har gjennomført to til tre.

Kva for modular dei har brukt, er ganske forskjellig etter korleis dei passar inn i dei enkelte idrettane og til eige årshjul.

– Vi jobbar vidare med at terskelen ikkje skal vere for stor for å ta programmet i bruk. Vi må gjere det enkelt for skulane både å bruke det og hente inn nytt materiale. Tanken er at skulane stadig meir skal overta dette sjølv. Da er vår jobb å hjelpe dei med å bygge system slik at dette blir brukt over tid. Slik at dette ikkje berre blir eit nytt prosjekt som forsvinn når vi er ferdig, seier Heiestad.

Dei jobbar også vidare med ein ny digital plattform og ressursar og brukarhandbøker som er retta mot trenarar og foreldre.

Visjonen er også at elevar på ordinære idrettslinjer skal kunne ta i bruk enkelte delar av Nærmere Best.

Kilde

Hege Heiestad: Prep to be PRO — building talent without burning it: An educational programme for specialised sports schools. Doktorgradsavhandling, Norges idrettshøgskole, 2026.

Powered by Labrador CMS