122 idear var den endelege fangsten under UiOs idéinnsamling på Karl Johan laurdag, melder Uniforum. – Målet er å samla inn 10 000 idear, så dette var ein god start, seier prosjektleiar Espen Røsbak i UiO200, UiOs jubileumssekretariat.

Både prorektor Inga Bostad, biologiprofessor Dag O. Hessen og klimaforskar Karen O´Brien var engasjerte for å samla inn gode idear til Universitetet i Oslo midt i laurdagshandelen på Karl Johan. Saman med studentar frå mange ulike fakultetet, stod dei på Karl Johan med kvar sine bøsser for å samla inn idear frå folk flest.

Nokre trudde dei samla inn pengar, og la myntar på innsamlingsbøssene. Andre hasta forbi og sa at dei ikkje hadde pengar å gi. Dei som fekk med seg at dei eigentleg var på jakt etter idear, og ikkje pengar, stansa og begynte å skriva opp ein del viktige idear som Universitetet i Oslo burde engasjera seg i.