Universitetet i Bergen sitt nye forskingssenter skal utforska havdjupa, der ingen andre har vore før. K.G. Jebsen-senter for dyphavsforsking vart offisielt opna av klima- og miljøminister Vidar Helgesen 29. mai 2017.

– Det er ein stor dag for norsk marin forsking når vi markerer opninga av det nye Jebsen-senteret for dyphavsforsking her ved Universitetet i Bergen, sa Helgesen.

Ved hjelp av nyskapande teknologi som  fjern- og sjølvstyrte undervatnsfarkostar, forankra riggar og gliderar, bøyer og undersjøiske observasjonsplattformar kan ein oppdaga og utforska havdjup ingen andre har sett før. Kvite flekkar på det undersjøiske kartet kan fyllast ut.