Den 13. mai blei fysikkforskaren Omid Kokabee frå University of Texas i Austin dømt til ti års fengsel i Iran skulda for å ha hatt illegal kontakt med ei utanlandsk regjering.  No ber Universitetet i Oslo iranske styresmakter om å gi han høve til å appellera dommen til ein upartisk domstol og gi han medisinsk behandling i fengselet, melder Uniform.

Det var i februar 2011 fysikkforskaren Omid Kokabee blei arrestert på flyplassen i Teheran etter at han hadde vore på besøk hos foreldra sine i heimlandet. Etter å ha vore i fengsel i 15 månader, blei han dømt til ti års fengsel 13. mai i år for å ha hatt illegal kontakt med ei utanlandsk regjering. Han har sjølv heile tida nekta for å ha gjort det han blir skulda for av iranske styresmakter. Både organisasjonane Scholars at Risk og Concerned Scientists har protestert mot dommen. No gjer også Universitetet i Oslo det.

– Universiteta har eit ansvar for å reagera når me ser at rettane til studentar og akademikarar blir truga, slik me meiner skjer i denne saka, seier UiO-rektor Ole Petter Ottersen. Han viser til at dette er ei viktig oppgåve for UiO.

– Dette er jo heilt i samsvar med UiOs engasjement i Scholars at Risk, som skal støtta opp om akademisk fridom og motarbeida undertrykking av forsking og utdanning, uansett kvar i verda dette skjer, understrekar Ottersen.