Prorektor Ruth Vatvedt Fjeld og viserektor Knut Fægri er dei nye ansikta i rektoratet til Ole Petter Ottersen. Denne veka inntok dei 9. etasje i Lucy Smiths hus.

– Utsynet over Oslo frå prorektorkontoret er flott, synest prorektor Ruth Vatvedt Fjeld. – For 15 år sidan då eg var prorektor, var det endå meir interessant, for då kunne me sjå flya gå inn for landing på Fornebu, minnest viserektor Knut Fægri.

Begge har hatt ei mjuk opning på den første veka i rollene som prorektor og viserektor. – Dei første dagane har eg drive og observert litt, samtidig som eg har gått leksikografi-konferansen som eg er medarrangør av, fortel Ruth Vatvedt Fjeld.