Professor Tor Austad (UiS) og forskingssenteret Corec ved IRIS er tildelt Oljedirektoratet sin IOR-pris for 2010. Austad og Corec vert heidra for den svært viktige forskinga som er utført for å få meir olje ut av krittfelta.

IOR-prisen (IOR, improved oil recovery, auka oljeutvinning) vart delt ut på Norsk petroleumsforening sin konferanse om reservoarstyring i Stavanger i dag, 7. juni.

Professor Tor Austad ved Universitetet i Stavanger og Corec deler IOR-prisen for 2010. Deira forskingsresultat er avgjerande for forståinga av dei reservoarmessige utvinningsmekanismane for krittfelta i den sørlige delen av Nordsjøen. Forskinga deira gir dermed eit viktig grunnlag for dei avgjerdene oljeselskapa må ta.