Unge som vil gjere forskarkarriere ved ein høgskole, kan bli skuffa. Utan tid til forsking blir draumen fort knust, skriver Forskerforum.

– Det er ikkje lett å utvikle ein forskarkarriere ved ein mindre høgskole. Du skal ha mykje flaks òg, seier førsteamanuensis Ingunn Alne Hoell ved Høgskolen i Stord/Haugesund. Ho fekk jobb ved ingeniørutdanninga ved Høgskolen i Stord/Haugesund etter avslutta ph.d.-utdanning ved Universitetet for miljø- og biovitskap.

– Når ein kjem som nyutdanna med doktorgrad til ein høgskole, får ein gjerne 100 prosent undervisning. Det var eit sjokk å oppdage at eg ikkje fekk tid til FoU. Då er det ikkje enkelt å prøve å byggje opp ein forskarkarriere parallelt med undervisninga.

Ho fortel at dei vitskapleg tilsette ved høgskolen i utgangspunktet ikkje har rett til å forske.

– Det ein må gjere, er å søkje om FoU-tid. Om ein sjølv klarer å skaffe eksterne midlar, kan ein bli frikjøpt frå undervisninga. Det verste er det uføreseielege, at ein ikkje veit om ein får FoU-tid til neste år. Slik trur eg det er fleire stader. Når det er sagt, har eg heilt andre arbeidsforhold i dag fordi eg har greidd å skaffe eksterne forskingsmidlar.