Universitetet på Island har måtta kutta budsjettet sitt dei siste tre åra på grunn av finanskrisa. Fleire tilsette har mista jobben, men samtidig er det aldri tidlegare blitt publisert så mange vitskaplege artiklar i internasjonale fagtidsskrift, opplyser rektor Kristina Ingolfsdottir til Uniforum.

Etter to år som rektor måtte Kristina Ingolfsdottir bruka dei siste tre åra av rektorperioden sin til å innføra årlege budsjettkutt. Likevel blei ho attvald for ein ny femårsperiode tidlegare i år. Rett nok utan motkandidat, medan det var fire kandidatar då ho vart vald til rektor første gong. I førre veke tok ho ein pustepause frå nedskjeringar på Island for å delta på konferansen om forskingsuniversitetet som studiestad ved Universitetet i Oslo.

I eit intervju med Uniforum legg ho ikkje skjul på at det har vore tøft.

– No er budsjettet skore så langt inn til beinet at me ikkje kan krevja at dei tilsette ved Universitetet på Island ofrar meir. Dei har allereie fått redusert lønna og mange heiltidstilsette har måtta bli deltidstilsette. Fleire har også mista jobbane sine, seier Ingolfsdottir og ser svært lei seg ut.